انهاردة جه على بالى أقول لجوزى يتجوز تانى بعد ما أموت ...
كنت طول عمرى معجبة جدا بفكرة الراجل المخلص لمراته حتى بعد موتها، الراجل اللى مراته تموت ويفضل عايش بقيت عمره على ذكراها، يعيش مخلص لحبه ليها وحاسس بيها جوه قلبه كأنها لسه عايشة معاه. كنت بتمنى إنى لو مت قبل جوزى يعيش مخلص لحبه ليا ويفضل طول عمره مش شايف حد غيرى ولا يعرف يحب حد بعدى.
طبعا الكلام ده على أرض الواقع نادر جدا، مش بنشوفه غير فى الأفلام أو فى شخصيات قليلة أوى فى حياتنا، أو فى (يوميات ونيس).
أما بقى عكس الوضع فبنشوفه كتير أوى. يعنى مش غريب أبدا بالنسبالنا لما نلاقى ست جوزها مات وهى عايشة بعده على ذكراه، تربى ولادها وتفتكره وتحسه معاها فى كل لحظة.علشان كده عمرى ما فكرت فى الموضوع من وجهة نظر الراجل، دايما كنت بفكر فيه من وجهة نظرى أنا، من وجهة نظر الست.
انهاردة كنت بتفرج على مسلسل فيه راجل كبير فى السن، مراته ماتت وحزن عليها حزن كبير أوى، وفضل فترة كبيرة تعبان جدا من حزنه عليها لدرجة إنه كان بيدخل المستشفى كتير من كتر حزنه.وبعد فترة كبيرة بدأ يحاول يشوف شغله علشان ينسى بيه حزنه. وف شغله قابل واحدة ليها معاه شغل، ومع طول المعاملة بينهم قربوا من بعض، وحبها واتجوزوا.
مش عارفة ليه ساعتها بس افتكرت أمنيتى اللى اتمنيتها من زمان، وفكرت فى الوضع بالعكس.يا ترى لو جوزى "بعد الشر عليه" مات قبلى، وبعد فترة كبيرة من وفاته قابلت شخص استريحتله، يا ترى حقبل إنى أفضل مقيدة بذكرى جوزى ومحاولش أبدأ حياة زوجية جديدة ؟! هل حمنع نفسى ساعتها من حق كفلهولى ربنا ؟!حسيت ساعتها أد ايه كنت أنانية فى أمنيتى. إزاى أطلب من جوزى إنه يفضل مخلص ليا بعد وفاتى ؟؟
ومين قال أصلا إن هو لو حب واحدة تانية بعدى واتجوزها يبقى خاننى ؟؟
ربنا وهبنا نعمة عظيمة فى الدنيا اسمها نعمة النسيان.
طبعا أنا هنا مقصدش نسيان الشخص نفسه، لكن أقصد نسيان ألمنا وحزننا ووجعنا. النسيان هو اللى بيخلينا نقدر نكمل حياتنا، هو اللى بيخلينا نستمر رغم آلامنا وأحزاننا.مفيش مانع لو جوزى حس إنه محتاج واحدة تانية بعد ما اموت إنه ياخدها ويتجوزها ويكمل معاها حياته. ممكن يفضل فاكرنى كشخص كان بيحبه وقضى ذكريات كتير، لكن مش بالضرورة يوقف حياته بعد ما أموت علشان أنا طلبت منه كده وأنا عايشة. مع إنى أعتقد إنه ساعتها لو نفذ طلبى مش حبقى حاسة ولا حيكون فارق معايا فى شئ، لأنى حكون فى مكان بعيد عن كل الحسابات الدنيوية دى.
وقررت أوصى جوزى انهاردة إنه لو عاوز يحب ويتجوز بعد ما أموت أنا معنديش مانع.
يحب ويتجوز ويعيش حياته. أما لو هو اللى قرر يفضل عايش بعدى بحبى فى قلبه فأكيد أنا سعيدة بقرار زى ده.
ولقيت كمان إن وصيتى دى حترفع عنه أى حرج ممكن يحس بيه قام أهلى أو أى حد من عيلتى ممكن يلومه أو يعاتبه على جوزاه بعدى، ولو حتى بنظرة. على الأقل وصيتى دى حتكون دعم ليه قدامهم لو فضل يقدرهم ويهتم لمشاعرهم.
مع إن الكلام ده صعب عليا جدا دلوقتى إنى أكتبه، وأصعب إنى أقوله، وأصعب وأصعب إنى أتخيله ... لكن أنا متأكدة إنه لو تم ساعتها مش حكون متضايقة.
كنت طول عمرى معجبة جدا بفكرة الراجل المخلص لمراته حتى بعد موتها، الراجل اللى مراته تموت ويفضل عايش بقيت عمره على ذكراها، يعيش مخلص لحبه ليها وحاسس بيها جوه قلبه كأنها لسه عايشة معاه. كنت بتمنى إنى لو مت قبل جوزى يعيش مخلص لحبه ليا ويفضل طول عمره مش شايف حد غيرى ولا يعرف يحب حد بعدى.
طبعا الكلام ده على أرض الواقع نادر جدا، مش بنشوفه غير فى الأفلام أو فى شخصيات قليلة أوى فى حياتنا، أو فى (يوميات ونيس).
أما بقى عكس الوضع فبنشوفه كتير أوى. يعنى مش غريب أبدا بالنسبالنا لما نلاقى ست جوزها مات وهى عايشة بعده على ذكراه، تربى ولادها وتفتكره وتحسه معاها فى كل لحظة.علشان كده عمرى ما فكرت فى الموضوع من وجهة نظر الراجل، دايما كنت بفكر فيه من وجهة نظرى أنا، من وجهة نظر الست.
انهاردة كنت بتفرج على مسلسل فيه راجل كبير فى السن، مراته ماتت وحزن عليها حزن كبير أوى، وفضل فترة كبيرة تعبان جدا من حزنه عليها لدرجة إنه كان بيدخل المستشفى كتير من كتر حزنه.وبعد فترة كبيرة بدأ يحاول يشوف شغله علشان ينسى بيه حزنه. وف شغله قابل واحدة ليها معاه شغل، ومع طول المعاملة بينهم قربوا من بعض، وحبها واتجوزوا.
مش عارفة ليه ساعتها بس افتكرت أمنيتى اللى اتمنيتها من زمان، وفكرت فى الوضع بالعكس.يا ترى لو جوزى "بعد الشر عليه" مات قبلى، وبعد فترة كبيرة من وفاته قابلت شخص استريحتله، يا ترى حقبل إنى أفضل مقيدة بذكرى جوزى ومحاولش أبدأ حياة زوجية جديدة ؟! هل حمنع نفسى ساعتها من حق كفلهولى ربنا ؟!حسيت ساعتها أد ايه كنت أنانية فى أمنيتى. إزاى أطلب من جوزى إنه يفضل مخلص ليا بعد وفاتى ؟؟
ومين قال أصلا إن هو لو حب واحدة تانية بعدى واتجوزها يبقى خاننى ؟؟
ربنا وهبنا نعمة عظيمة فى الدنيا اسمها نعمة النسيان.
طبعا أنا هنا مقصدش نسيان الشخص نفسه، لكن أقصد نسيان ألمنا وحزننا ووجعنا. النسيان هو اللى بيخلينا نقدر نكمل حياتنا، هو اللى بيخلينا نستمر رغم آلامنا وأحزاننا.مفيش مانع لو جوزى حس إنه محتاج واحدة تانية بعد ما اموت إنه ياخدها ويتجوزها ويكمل معاها حياته. ممكن يفضل فاكرنى كشخص كان بيحبه وقضى ذكريات كتير، لكن مش بالضرورة يوقف حياته بعد ما أموت علشان أنا طلبت منه كده وأنا عايشة. مع إنى أعتقد إنه ساعتها لو نفذ طلبى مش حبقى حاسة ولا حيكون فارق معايا فى شئ، لأنى حكون فى مكان بعيد عن كل الحسابات الدنيوية دى.
وقررت أوصى جوزى انهاردة إنه لو عاوز يحب ويتجوز بعد ما أموت أنا معنديش مانع.
يحب ويتجوز ويعيش حياته. أما لو هو اللى قرر يفضل عايش بعدى بحبى فى قلبه فأكيد أنا سعيدة بقرار زى ده.
ولقيت كمان إن وصيتى دى حترفع عنه أى حرج ممكن يحس بيه قام أهلى أو أى حد من عيلتى ممكن يلومه أو يعاتبه على جوزاه بعدى، ولو حتى بنظرة. على الأقل وصيتى دى حتكون دعم ليه قدامهم لو فضل يقدرهم ويهتم لمشاعرهم.
مع إن الكلام ده صعب عليا جدا دلوقتى إنى أكتبه، وأصعب إنى أقوله، وأصعب وأصعب إنى أتخيله ... لكن أنا متأكدة إنه لو تم ساعتها مش حكون متضايقة.
No comments:
Post a Comment