أنا مش بنت

أنا مش بنت...وبفتخر.

اسأل الشباب عندنا ف مصر يعنى ايه بنت أو ايه مواصفات البنات ف مصر، حيردو عليك "وهم بيجزّوا على سنانهم" نفس الرد.

دلوعة، مايصة، كل دماغها لبس وموضة ومايكب ولفات طرح أو تسريحات شعر، وكل كلامها ياإما نميمة ياإما عن مسلسلات تافهة تفقع المرارة، وكل اهتمامتها الخروج فى المولات والكافيهات أو القعدة ع الفيس أو قدام التليفزيون، أما كلامها فكله (بليز، وسورى ،و اتس أوكى) أو (يا كوكى، ياتوتى، يا قلبى، يا عقلى). آدى ملخص كلمة بنت عندنا، اه وكمان بيحبو اوى السواقة مع انهم مبيعرفوش يسوقو ومهما اتعلمو برضو مبيعرفوش، ولا حيعرفو.

من منطلق هذا المفهوم، أقدر اقولكو وبكل فخر:

أنا مش بنت.

طول عمرى وانا واخدة الحياة جد جدا جدا. مش بصاحب ولاد ولا بمشى مع بنات "من النوعية اللى لسه شرحهالكو" ولما  دخلت الجامعة و ف تانى سنة ليا فى الكلية اشتركت فى أنشطة الكلية والموضوع ده زود الجد اللى ف حياتى وبقت الأنشطة والكورسات هما كل حياتى، حتى فى الأجازات.

مكنتش بفكر ف لبس ولا لفات طرح ولا خروجات. كان كبيرى الأزهر بارك أو كافيه ف وسط البلد مع انتيمتى (إتش).

وفضلت فترة كبيرة من حياتى وانا بالشكل ده، لأنى اتخرجت واشتغلت على طول ودايما مكنش عندى اى وقت فاضى، وفضل الحال ماشى كده بعد جوازى ولحد نص فترة حملى تقريبا لما تعبت وسبت الشغل. وفضلت قاعدة فى البيت حوالى سنتين أو أكتر. والموضوع ده عملى فراغ غير طبيعى. فراغ خلانى أبدأ أتحول...

بقيت مش بقوم من قدام التليفزيون، بتابع مسلسلات تافهة واتابع الموضة وأحدث الأزياء ولفات الطرح وخلافه. اشغل بالى باللبس والخروجات واللف فى المولات.

يعنى باختصار اتحولت وبقيت "بنت".

بس مكنتش مرتاحة. جزء منى حابب اللى بقيت بعمله وجزء تانى متضايق ومكتئب ومشتاق لنفسى القديمة.

وفضلت محتارة أفضل زى باقى البنات دلوقتى، ولا أرجع تانى زى ما كنت فى الأول؟؟

وعدت فترة وانا على نفس الحال لحد ما افتكرت إن الوسطية دايما هى الأفضل، والاعتدال ف كل شئ هو الأحسن.

يعنى ليه مكونش شيك وستايل وامشى ع الموضة "اللى يمشى منها معايا بس" ،واخرج واتفسح كل فترة كده، وف نفس الوقت أنمى نفسى بكورس اخده ولا كتاب أقراه ولا أى حاجة مفيدة أعملها ف يومى!!

ليه متعلمش السواقة واسوق بس من غير دلع ولا استهتار يخلى السواقين اللى حواليا يشدو ف شعرهم من البنات واللى علمهم السواقة !!

ايه المشكلة لما اتدلع مع أهلى واصحابى والناس القريبين منى، بـس مع الناس الغرب عنى أو فى شغلى وفى تعاملاتى أكون جد الجد !!

ايه المشكلة لما أجمع بين الصفات الفطرية اللى ربنا خالقها فى أى بنت (واللى بيتريق عليها الشباب وف نفس الوقت يزعلو لو مش موجودة فى البنت اللى معاهم) ،وبين صفات الست الجد المجتهدة الواعية المتفتحة واللى بتسيب علامة ف أى مكان تتواجد فيه.

وساعتها بقى يبقى هو ده التعريف الصح لكلمة بنت عندنا ف مصر.

وأقدر ساعتها أقول وبصوت عالى:

أنا بنت...وأفتخر